山險峻　路斜崎　為着紅顏　阮那為着紅顏即會到只 　　

袂得相見　阮袂得相見　叵耐延壽汝做事可不是　 　　

騙金不就掠騙金那不就　起有虎狼心意　 　　

虧阮一身那虧阮一身　到今旦阮受苦袂盡　 　　

恨煞奸臣毛延壽　汝掠阮一家來拆散遭流離 　　

阮身到只　今卜怙誰通訴起　 　　

思憶劬勞恩情重　思憶父母兄共弟　 　　

去到陰司　阮就去到陰司　一點靈魂卜來見媽親 　　

今旦來到只　今旦來到雁門關　 　　

那見壙野雲飛　牧馬鳴悲　對只雁門關　 　　

舉目一看　黑水滔天　越惹得阮思憶君親亇情緒 　　

我紛紛今卜怙誰通訴起　 　　

阮一身　阮一身恰親像花正開又遇着風擺搖枝 　　

又親像許中秋月正光被着許雲遮烏暗時 　　

值時會得相見面　除非着蝴蝶夢內 化作鴛鴦枕上即會鸞鳯棲止 　　

嗟　恨煞毛延壽　即會行來到只　 　　

汝掠阮一對鴛鴦拆散做二邊　苦痛傷悲目滓如珠淚滴淋漓 　　

見許旌旗閃閃　旌旗閃閃金鼓喧鬧　 　　

嗡　虧　虧阮一身來到只　只處無興無彩　 　　

四覓無親　舉目那無親　今卜怙誰人通訴起　 　　

阮四覓又都無親　今卜怙誰人通訴起