〔我有一句話〕的詞是陳達儒先生的作品, 是在1950年發表的, 歌詞是焉爾：

1　我有一句話　想欲對你表明　我的心肝內　為你相思未清
　　若是欲求愛　恐驚你肯也毋肯　想你的人影　不時在阮目睭前
2　我有一句話　想欲對你講起　想著真歹勢　見面講地講天
　　若是老實講　毋知生氣未生氣　進退真兩難　空思亂想到半暝
3　我有一句話　想欲對你參考　毋知你心內　這久感覺如何
　　若是有決心　希望永久欲相好　請你講一句　毋免害阮戇戇慒

各位朋友攏知影這首歌詞是在講有一句情話
焉爾咳、焉爾咳、咳半晡咳攏未出來, 哦真艱苦啦!
一句話對和平島旋到鵝鸞鼻、旋歸哺旋抑未到主題, 較早的人在談戀愛真閉塞,
所以陳達儒先生的詞纔會一句情話講出了後, 抑閣在煩惱對方的感覺如何,
各位朋友, 你講是抑毋是呢!
我有一句話的旋律是侯賜泉先生的作品, 侯賜泉先生的資料在彼本台灣民間歌謠內面的記載,
只有侯賜泉先生的作品有幾首的資料爾爾, 並無介紹伊的人, 這點又復愛給各位朋友抱歉囉!