日日春的詞是陳達儒先生的作品, 歌詞是按呢。
１〕阮是日日春,日日悶, 天光開花到黃昏,
紅花點姻脂, 白花抹水粉, 開花等待蝴蝶群。
２〕阮是日日春,日日愁, 怨嘆終身誰收留,
雖是薄命花, 日日也清秀, 呣是為著愛風流。
３〕阮是日日春,日日苦, 怨嘆快開快落土,
日來受著風, 夜來凍著露, 生成薄命無奈何。
值第一段的紅花點姻脂, 白花抹水粉, 第二段的雖是薄命花, 日日也清秀, 與第三段的日來受著風, 夜來凍著露, 是這首歌詞的精神所在, 也是展現出作者的功夫所在, 這陣的作者欲置三段仝款所在寫伽即呢對稱，恐驚是阿婆仔生孖正拚咧!
日日春的作曲家是 蘇桐先生, 蘇桐先生是一個真有個性的人, 值日據時代就是一位真有名的歌仔戲班的樂師。當台語流行歌拄咧莩蘡的時, 蘇桐先生作曲的才華著被唱片界看重, 伊與陳達儒先生一詞一曲的配合, 寫了足儕好聽的作品出來。
日日春是值1937年發表的, 這首歌較持殊的所在是值樂句佮樂句中間, 有三個過門, 這過門的意思是互唱的人小息一下, 阿互樂隊來演奏的所在著號做過門, 蘇桐先生真敖摃楊琴, 我是值想, 這三個過門是呣是與楊琴有關係, 真可惜! 蘇桐先生值1971年著來過身, 這個問題煞找無答案。